ရေးသားသူ ✒️✒️✒️ ကုလသမဂ္ဂ အတွင်းရေးမှူးချုပ်ဟောင်း ဦးသန့်
အခန်း (၄)
မိဘဆရာများအသင်းကို စနစ်တကျ ဖွဲ့စည်း၍ စိတ်ပါလက်ပါ ဆောင်ရွက်ကြပါက သက်ဆိုင်ရာကျောင်းနှင့် ကျောင်းသူ ကျောင်းသားများအတွက် အကျိုးများမည်မှာ သေချာပေသည်။ ဆရာကို အပြစ်ရှာလိုသော သဘောဖြင့်ဖွဲ့စည်းခြင်း၊ နာမည်ထင်ပေါ်စေလို၍ဖွဲ့စည်းခြင်းမျိုးမဖြစ်စေဘဲ စေတနာသန့်သန့်နှင့် ကျောင်း၏ အကျိုးကိုရည်ရွယ်၍သာ ဖွဲ့စည်းသင့်ပေသည်။ ထိုသို့သော ရည်ရွယ်ချက်ဖြင့် ဆရာ မိဘအသင်း များကို ဖွဲ့စည်းခြင်းသည် ကျောင်း၏ တိုးတက်ရာ တိုးတက်ကြောင်းကို ဖြစ်စေရုံမျှမက၊ ကျောင်းတွင်း ဒီမိုကရေစီ ပြန့်ပွားခြင်းတွင်လည်း များစွာ အထောက်အပံ့ ဖြစ်စေနိုင်ပေသည်။
မိဘနှင့် စာသင်ကျောင်း
ကျောင်းသားမိဘများသည် စာသင်ကျောင်းများနှင့်မည်သို့ ဆက်ဆံသင့်သည်ဟူသော ပြဿနာမှာ ယခုထက်တိုင် ဝိဝါဒ ကွဲပြားလျက်ရှိသေးသည်။ အချို့သော ပညာရေး ပါရဂူတို့၏ အလိုမှာ ကျောင်းသား မိဘ များသည် အသင်းအဖွဲ့သတ်သတ် ဖွဲ့စည်းလျက် ကျောင်းတိုးတက်ရာ တိုးတက်ကြောင်းကို ပြင်ပမှ အကြံဉာဏ်များ ပေးရမည်ဟု ဆိုပေသည်။ အချို့ပါရဂူများ၏ အယူအဆမှာမူကား ကျောင်းသားမိဘများနှင့် ဆရာ ဆရာမများသည် ပူးပေါင်းလျက် အသင်းအပင်းဖွဲ့စည်းပြီးလျှင် ကျောင်း၏ တိုးတက်ရာ တိုးတက်ကြောင်းကို အကြံဉာဏ်များပေးသင့်သည်ဟု ဆိုလေသည်။ အချို့ပါရဂူတို့၏ ယူဆချက်ကား စာသင် ကျောင်းများ၏ ကိစ္စသည် ဆရာများနှင့် ကျောင်းသူ ကျောင်းသားများ၏ ကိစ္စသက်သက်သာဖြစ်သဖြင့် ပြ်ပမှ မိဘများက ဝင်ရောက်စွက်ဖက်ပါက စိတ်ညစ်စရာ ကိစ္စများ ပေါ်ပေါက်ရန် အကြောင်းရှိသည်။ ထို့ကြောင့် ကျောင်းသား မိဘများ အသင်းသော်လည်းကောင်း ဖွဲ့စည်းရန်မသင့်ဟု ယူဆကြလေသည်။
ဖွဲ့စည်းပြီးဖြစ်သော ကျောင်းသား မိဘများအသင်း သို့မဟုတ် မိဘ ဆရာ အသင်းများမှာလည်း အများ အားဖြင့် ကျောင်းတွင်းရေးကိစ္စများကို ဝင်ရောက်စွက်ဖက်ခြင်းမရှိဘဲ ကျောင်းကပွဲမျိုးကဲ့သို့သော ပျော်ရွှင်မှု များ ဖန်တီးခြင်း၊ မိတ်ဆက်လဘက်ရည်ပွဲများ ကျင်းပခြင်းဖြင့်သာလျှင် ဆောင်ရွက်ကြလေသည်။ အနည်းငယ်မျှသော ကျောင်းသားမိဘအသင်း သို့မဟုတ် ဆရာမိဘအသင်းများသည်သာလျှင် ကျောင်းတွင်းရေး ကိစ္စများသည် ၎င်းတို့နှင့် တိုက်ရိုက်ဆက်သွယ်သော ကိစ္စများဖြစ်သည်ဟု မှတ်ယူကြ၍ သင်ကြားပြသမှု၊ ကစားခုန်စားကိစ္စများ၊ စာရိတ္တပြဿနာများကိုပါ အရေးယူစဉ်းစားကြလေသည်။ အချို့သော ကျောင်းများတွင် ထိုသို့သော အသင်းမျိုး ဖွဲ့စည်းတည်ထောင်ခြင်းမပြုသော်လည်း မည်သည့်ကျောင်းသားမိဘမဆို ကျောင်းသို့လာရောက်နိုင်ခွင့်ရှိ၍ ဆရာကြီးနှင့်သော်လည်းကောင်၊ ဆရာ ဆရာမများနှင့်သော်လည်းကောင်း တွေ့ဆုံဆွေးနွေးခွင့်ပြုထား၏။ ထိုသို့ပြုထားသဖြင့်လည်း အသင်းအပင်းများ ဖွဲ့စည်းရန်မလိုဟု ယူဆကြလေသည်။
ထိုသို့ကျောင်းသား မိဘများအသင်း၊ သို့မဟုတ် ဆရာ မိဘများအသင်း ဖွဲ့သင့် မဖွဲ့သင့် ပြဿနာကို မစဉ်းစားမီ အထူးဂရုပြုရမည့်အချက်တစ်ချက်ရှိပေသည်။ ကျောင်းတွင်းပညာသင်ကြားရေးတွင် အသိဉာဏ် အားဖြင့်လည်းကောင်း၊ ဗဟုသုတအားဖြင့်လည်းကောင်း၊ ဆရာသည် ကျောင်းသားထက်ပို၍ (တော်) သည် ဟူသော အချက်ကို အသိအမှတ်ပြုထားသကဲ့သို့ ကျောင်းတွင်းပညာသင်ကြားရေးတွင် ဆရာသည် ကျောင်းသား မိဘထက်ပို၍ (တော်)သည်ကို ယေဘူယျအားဖြင့် အသိအမှတ်ပြုရပေမည်။ ထို့ကြောင့် ကျေင်းသားမိဘအသင်းများ ဖွဲ့စည်းသည်ဖြစ်စေ၊ ဆရာ မိဘ အသင်းများ ဖွဲ့စည်းသည်ဖြစ်စေ ဘာသာရပ်များကို သင်ကြားရေးတွင် ကျောင်းသားမိဘများသည် ဆရာ ဆရာမများ၏ နယ်နိမိတ်ကို ကျူးကျော်ခြင်း မပြုကြရန် သတိပြုရန်လိုပေသည်။ ရံဖန်ရံခါ သင်ကြားမှုနှင့်ပတ်သက်၍ အကြံပေးစကား ပြောကြားနိုင်မည်ဖြစ်သော်လည်း ဝင်ရောက်စွက်ဖက်ခြင်းမူကား မပြုလုပ်သင့်ပေ။ ဥပမာအားဖြင့် မိမိ၏ကလေးကို ဂဏန်း သင်္ချာ သင်ကြားရာတွင် နည်းလမ်း ချွတ်ယွင်း၍နေသည်ဟု ထင်မြင်ယူဆကပါက မည်ကဲ့သို့ ပြုပြင်သင်ကြား သင့်သည်ဟု အကြံဉာဏ်ပေးလျှင် သက်ဆိုင်ရာ ဆရာ (သို့) ဆရာမက ပြန်လည်ဖြေကြား နိုင်စရာ အကြောင်း ရှိပေသည်။
ကျောင်းသားမိဘများသာလျှင် သတ်သတ် အသင်းအပင်း ဖွဲ့စည်းသကဲ့သို့ အရေးပါအရာရောက်မည် မဟုတ်ပေ။ ဆရာ ဆရာမများမပါဝင်သော ကျောင်းသားမိဘအသင်းသည် ဆရာ ဆရာမများနှင့် အဆက် မရှိသဖြင့် ကျောင်းတွင်းကိစ္စများကို ကောင်းစွာ သိရှိနားလည်မည် မဟုတ်ပေ။ ထိုအသင်းမျိုးသည်လည်း အများအားဖြင့် ကျောင်းအတွက် အလှူခံခြင်း၊ တွေ့ဆုံလဘက်ရည် သောက်ခြင်းမျိုးကိုသာ ဆောင်ရွက်နိုင်ပေမည်။ ထို့ကြောင့် အများဆုံးသော အကျိုးဖြစ်ထွန်းစေရန်အတွက် ဆရာမိဘများ ပူးပေါင်း၍ အသင်းအပင်းဖွဲ့စည်းသင့်ပေသည်။ ထိုသို့ဖွဲ့စည်းရာတွင်လည်း အနည်းဆုံး အောက်ပါရည်ရွယ်ချက်များ ရှိသင့်ပေသည်။
(၁) ကျောင်းနှင့် အိမ်ကို ပိုမိုနီးကပ်စေခြင်းဖြင့် ကလေး၏ ပညာသင်ကြားမှုကို တိုးတက်ကောင်းမွန်စေခြင်း။
(၂) ခေတ်အလျောက် တိုးတက်လျက်ရှိသည့် ပညာရေးစနစ်သစ်များကို ကျောင်းသား မိဘများအား သိရှိနားလည်စေခြင်း။
(၃) နိုင်ငံတော်၏ ကလေးသူငယ်များ ပညာသင်ကြားမှုတွင် တိုင်းရင်းသားတိုင်း စိတ်ပါဝင်စားသင့်သည့်အတိုင်း နိုင်ငံတော်သားများအဖြစ် စိတ်ဝင်စားမှုကို ပြသသင့်ခြင်း။
အထက်ပါ ရည်ရွယ်ချက်များသာမက သက်ဆိုင်ရာကျောင်း၏ ကောင်းရာကောင်းကြောင်းအတွက် တတ်နိုင်သော နည်းလမ်းများဖြင့် အားပေးကူညီရန် ရည်ရွယ်ချက်လည်း ပါရှိရပေမည်။
ဆရာ မိဘအသင်းများကို မဖွဲ့စည်းမီ သက်ဆိုင်ရာ ကျောင်းဆရာကြီးနှင့် ဆရာ ဆရာမ များသည် ကိစ္စအရပ်ရပ်ကို အသေးစိတ်ကြိုတင်စဉ်းစား သင့်ပေသည်။ ထိုသို့ ဖွဲ့စည်းလျှင် မည်ကဲ့သို့ စည်းကမ်းများ သတ်မှတ်သင့်သည်။ အမှုဆောင် ကော်မီတီကို မည်ကဲ့သို့ ရွေးချယ်သင့်သည်။ မည်သူက ဥက္ကဋ္ဌအဖြစ် ဆောင်ရွက်သင့်သည်ဟူသော ပြဿနာရပ်များကို ကြိုတင်ဆွေးနွေးတိုင်ပင်ထားလျှင် လွယ်ကူပေမည်။ အချို့သော ဆရာ မိဘများအသင်းတွင် ကျောင်းဆရာကြီးက ဥက္ကဋ္ဌအဖြစ်ဆောင်ရွက်၍ မိဘများမှလည်း ပညာရေးတွင် စိတ်ပါဝင်စားသူတစ်ဦးက ဒုတိယဥက္ကဋ္ဌအဖြစ် ဆောင်ရွက်သည်။ ထိုနည်းအတူပင် ကျောင်းသား မိဘတစ်ဦးက အတွင်းရေးမှူးအဖြစ်ဆောင်ရွက်လျှင် ဆရာ၊ ဆရာမတစ်ဦးဦးက တွဲဖက်အတွင်းရေးမှူးအဖြစ် ဆောင်ရွက်ရလေသည်။ ဤကဲ့သို့ စီမံခြင်းသည် လုပ်ငန်းများတွင် ပိုမိုလွယ်ကူစေ၍ ဆရာနှင့်မိဘများလည်း ပိုမို၍နားလည်မှုရှိပေမည်။ အမှုဆောင် ကော်မတီတွင် ဆရာနှင့် မိဘများမျှတစွာပါဝင်လျှင် လုပ်ငန်းအရပ်ရပ်တွင် ပိုမိုချောမော အောင်မြင်စရာလမ်းရှိပေသည်။
ဆရာမိဘအသင်း အစည်းအဝေးများကို တစ်လလျှင်တစ်ကြိမ်လောက် ကျင်းပနိုင်ပါက အလွန်ကောင်းမွန်၏။ ထိုသို့မဖြစ်နိုင်ပါက တစ်နှစ်လျှင်နှစ်ကြိမ်ခန့် ကျင်းပသင့်ပေသည်။ ထိုသို့ကျင်းပသော အစည်းအဝေးများတွင် ကျောင်းပိတ်ပွဲ၊ ကျောင်းကစားပွဲ၊ ကျောင်းကပွဲစသော ကိစ္စများသာမက ကျောင်းသားများ၏ ကိုယ်ကျင့်တရား၊ ကျောင်းသားများ၏ ကျန်းမာရေးစသည်တို့ကိုပါ ထည့်သွင်းစဉ်းစား ဆွေးနွေးသင့်ပေသည်။ ထိုသို့ စဉ်းစားဆွေးနွေးရမည့်ကိစ္စများကို အသင်းဖွဲ့စည်းသည်နှင့် တပြိုင်နက် သတ်မှတ် ပြဌာန်းထားလျှင် လွယ်ကူပေမည်။ ထိုသို့ သတ်မှတ်ထားသည့် နယ်နိမိတ်အတွင်း၌သာ စဉ်းစားဆွေးနွေးလျက် ထိုနယ်နမိတ်က ကျော်လွန်သော ကိစ္စရပ်များကို ထည့်သွင်း စဉ်းစားခြင်း မပြုသင့်ပေ။ ထိုကဲ့သို့ စည်းကမ်းများကို ကြိုတင်သတ်မှတ်ထားခြင်းသည် လုပ်ငန်းဆောင်တာများတွင် ပြေပြေပြစ်ပြစ်ဖြစ်စေနိုင်၏။
အလွန်ကြီးသော ကျောင်းများတွင် မိဘ ဆရာအသင်းများ ဖွဲ့စည်းခဲ့လျှင် ရပ်ကွက်အလိုက် အသင်းခွဲများ ဖွဲ့စည်းလေ့ရှိသည်။ ကျောင်းသားမိဘများမှာ နေရာအနှံ့အပြားတွင် နေထိုင်ကြသည်ဖြစ်ရာ နီးစပ်ရာ ရပ်ကွက်အလိုက် မိဘအချင်းချင်းပူးပေါင်းဖွဲ့စည်းလျှင် လုပ်ငန်းတွင်ကျယ်ပေမည်။ ဥပမာ မိမိတို့ သက်ဆိုင်ရာ ရပ်ကွက်နှင့် ဆိုင်သော ပြဿနာတစ်ရပ်ပေါ်ပေါက်လာလျှင် ၎င်းတို့ အချင်းချင်း စုဝေး၍ ဆွေးနွေး နိုင်ပေသည်။
မိဘဆရာများအသင်းကို စနစ်တကျ ဖွဲ့စည်း၍ စိတ်ပါလက်ပါ ဆောင်ရွက်ကြပါက သက်ဆိုင်ရာကျောင်းနှင့် ကျောင်းသူ ကျောင်းသားများအတွက် အကျိုးများမည်မှာ သေချာပေသည်။ ဆရာကို အပြစ်ရှာလိုသော သဘောဖြင့်ဖွဲ့စည်းခြင်း၊ နာမည်ထင်ပေါ်စေလို၍ဖွဲ့စည်းခြင်းမျိုးမဖြစ်စေဘဲ စေတနာသန့်သန့်နှင့် ကျောင်း၏ အကျိုးကိုရည်ရွယ်၍သာ ဖွဲ့စည်းသင့်ပေသည်။ ထိုသို့သော ရည်ရွယ်ချက်ဖြင့် ဆရာ မိဘအသင်း များကို ဖွဲ့စည်းခြင်းသည် ကျောင်း၏ တိုးတက်ရာ တိုးတက်ကြောင်းကို ဖြစ်စေရုံမျှမက၊ ကျောင်းတွင်း ဒီမိုကရေစီ ပြန့်ပွားခြင်းတွင်လည်း များစွာ အထောက်အပံ့ ဖြစ်စေနိုင်ပေသည်။
ကျောင်းတွင်း ဒီမိုကရေစီ အခန်း (၅)
ကျောင်းတွင်း ဒီမိုကရေစီ အခန်း (၅)
0 comments:
Post a Comment