ကျောင်းတွင်း ဒီမိုကရေစီ အခန်း (၅)

ရေးသားသူ ✒️✒️✒️ ကုလသမဂ္ဂ အတွင်းရေးမှူးချုပ်ဟောင်း ဦးသန့်

ကျောင်းလောကသည် ပြင်ပလောကနှင့် အဆက်ပြတ်၍ ထည်းထည်း တည်ရှိနိုင်သော လောကမဟုတ်ပေ။ ပြင်ပလောကဆိုသည် မှာလည်း မိမိတို့၏ နိုင်ငံတစ်ခုတည်းကိုသာ ကွက်၍ မြင်ရသော ကျဉ်းမြောင်းသည့်လောကမျိုး မဖြစ်စေသင့်ပေ။ ကမ္ဘာလောကတစ်ခုလုံးကြိုခုံ၍ မြင်နိုင်သော ကျယ်ဝန်းသည့်လောကမျိုးသာ ဖြစ်သင့်၏။ ကမ္ဘာပေါ်ရှိ နိုင်ငံအသီးသီးသည် တနေ့ထက်တနေ့ ပိုမိုရင်းနှီးစွာ ဆက်ဆံလာကြရသည် ဖြစ်ရကား တိုင်းစိတ် ပြည်စိတ် မွေးမြူရုံမျှမက ကမ္ဘာစိတ်ကိုလည်း မွေးမြူနိုင်ကြရန် ရှေ့ဆောင်သင်ကြားမှုသည် ပညာရေး ရှေ့ဆောင် လမ်းပြတို့၏ အရေးကြီးသော တာဝန်တရပ်ဖြစ်ပေသည်။

အခန်း(၅)

ကျောင်းနှင့် လောက ဇာတ်ခုံ

ကျောင်းတွင်း ဒီမိုကရေစီ အောင်မြင်ရေးအတွက် ကျောင်းလောကသည် ပြင်ပလောကနှင့် ဆက်စပ် နိုင်သမျှ ဆက်စပ်ရမည်ဖြစ်၏။ ကျောင်းသူ ကျောင်းသားများသည် ကျောင်းလောက၏ ပြဿနာရပ်များကို ရင်ဆိုင်ရာတွင် ပြင်ပလောက၏ ပြဿနာရပ်များကိုပါ လေ့လာနိုင်သလောက် လေ့လာရပေမည်။ သို့မှသာလျှင် ကျောင်းသူ ကျောင်းသား ဘဝသည် လောကကြီးကို ရင်ဆိုင်နိုင်ရန် အတွက် သင်ခန်းစာပေးသော ဘဝ ဖြစ်ပေမည်။

ကျောင်းသူကျောင်းသားများသည် ရံဖန်ရံဖန် ကျောင်းဝင်းပြင်ပရှိ လောကလုပ်ငန်းများကို လေ့လာ ကြည့်ရှုသင့်၏။ ဆေးရုံများ၊ အလုပ်ရုံများ၊ လယ်ယာများ၊ စာတိုက်များ၊ ရုံးများ၊ ရဲဌာနများ၊ မြူနီစပယ်အဖွဲ့များ၊ မီးသတ်ဌာနများ၊ ဆိပ်ကမ်းများ၊ မီးရထားရုံများ စသည်တို့ကို သွားရောက်လည်ပတ်၍ လေ့လာလျှင် စာတွေ့ ထက် ထူးခြားပိုမိုသော အသိဉာဏ်တမျိုးကို ရရှိပေမည်။ ထိုသို့ သွားရောက်လည်ပတ်ရာတွင် သက်ဆိုင်ရာ ကျွမ်းကျင်သူ ပုဂ္ဂိုလ်များ လိုက်ပါရန် အထူးအရေးကြီးပေသည်။ ၎င်းတို့ ကိုယ်တိုင် ရှင်းလင်းပြေပြခြင်းသည် အရေးကြီးသော အချက်အလက်များကို မှန်ကန်စွာ ရှင်းလင်းပြောပြခြင်းဖြစ်သဖြင့် ဗဟုသုတလည်း တိုး၍ ကလေးသူငယု်များ၏ စိတ်တွင်လည်း စွဲလမ်းခြင်း ဖြစ်ပေမည်။ အထက်ပါ နေရာများသို့ ကြိုတင် စီစဉ်မှု မရှိဘဲ သွားရောက် လည်ပတ်ပြီးလျှင် သာမန်ကာ လျှံကာ ကြည့်ရှုခြင်းမျိုးသည်ကား အကျိုးမရှိသည့်အပြင် ကျောင်းသူ ကျောင်းသားကလေးများ၏ စိတ်တွင် သာမန်ကာလျှံကာ ကြည့်တတ်သော စိတ်ထားမျိုး ပေါ်ပေါက်စေတတ်၏။ ထို့ကြောင့် စေ့စေ့စပ်စပ် ကြည့်ရှုလေ့လာနိုင်ရန် အရေးကြီးပေသည်။

ထိုသို့ ကြည့်ရှုပြီးနောက် စိတ်တွင် မည်မျှ စွဲလန်းသည် မည်ကဲ့သို့ စွဲလန်းသည်ဟူသော အချက်ကို စစ်ဆေးနိုင်ပေသည်။ စစ်ဆေးသော နည်းမှာ အမျိုးမျိုးရှိ၏။ ပထမနည်းမှာ ထိုသို့သွားရောက်ကြည့်ရှုပြီးနောက် ကျောင်းသို့ပြန်ရောက်လာကြသောအခါ ကိုယ်တွေ့ ဗဟုသုတများကို ပြန်လည်ရေးသားစေခြင်းဖြစ်၏။ ဒုတိယနည်းမှာ သွားရောက်လည်ပတ်စဉ်၌ပင် မိမိတို့ ရေးသားလိုသော မှတ်စုများကို မိမိတို့ သဘောအတိုင်း ရေးသားစေခြင်းဖြစ်၏။ တတိယနည်းမှာ သွားရောက်လည်ပတ်ပြီးနောက် ဗဟုသုတ ဆွေးနွေးနှီးနှောပွဲမျိုး အနေနှင့် ကျောင်းသား အချင်းချင်း ပြောဆို ဆွေးနွေးခြင်းပင်ဖြစ်ပေသည်။

ထိုကဲ့သို့သွားရောက် လည်ပတ်နိုင်ရန်အတွက် ကျောင်းသားဟောင်းများ အသင်းသည် များစွာ အကူအညီပေးနိုင်ပေသည်။ ဥပမာ ကျောင်းသားဟောင်းတစ်ဦးသည် မီးသတ်ဌာနတွင် ဝင်ရောက်လုပ်ကိုင် နေသူဖြစ်မူ ၎င်းကပင်ရှေ့ဆောင်၍ ကျောင်းသားငယ်များကို စုရုံးခေါ်ဆောင်ပြီးလျှင် မီးသတ်လုပ်ငန်း အရပ်ရပ်ကို ရှင်းလင်းပြောပြနိုင်ပေသည်။ ကျောင်းသားဟောင်း တစ်ဦးသည် မြူနီစပါယ်ရုံးတွင် လုပ်ကိုင်နေသူ ဖြစ်လျှင် (ဝါ) မြူနီစံပါယ် လူကြီးတစ်ဦးဦးဖြစ်နေလျှင် ကျောင်းသားငယ်များကို စုရုံးခေါ်ဆောင်၍ မြူနီစပယ် အဖွဲ့၏ လုပ်ငန်းများကို ရှင်းလင်းပြောပြနိုင်ပေသည်။ 

ထိုသို့သွားရောက်၍ ကိုယ်တိုင် ကြည့်ရှုခြင်းသည် ကျောင်းသင်ပညာရပ်များနှင့်လည်း ဆက်စပ်၍ ရပေသည်။ ဥပမာ အခြေခံ ဓနဗေဒပညာ၊ ပြည်သူ့နီတိပညာစသည်တို့ကို စာတွေ့သင်ကြားပြီးနောက် ငါတွေ့လည်း ဆက်စပ်၍ သင်ကြားလျှင် စိတ်ထဲတွင် ပိုမိုစွဲမြဲစေလိမ့်မည်။ ပြည်သူ့နီတိပညာတွင် အခွန်တော် အကြောင်း သင်ကြားပို့ချပြီးနောက် အခွန်တော်ဌာနသို့ ကျောင်းသူ ကျောင်းသားများကို ခေါ်ဆောင်လျှက် အခွန်တော်အရာရှိက လက်တွေ့ရှင်းလင်းပြောပြခြင်းမျိုးသည် စာတွေ့နှင့် ကိုယ်တွေ့ ပညာများကို ဆက်စပ်ပေးခြင်းပင် ဖြစ်၏။ ရဲသားများ၏ လုပ်ငန်းကိုစာတွေ့သင်ကြားပြီးနောက် ရဲဌာနသို့ သွားရောက်ပြီးလျှင် လွန်ခဲ့သော တစ်ပတ်အတွင်း ရဲအရာရှိများ ရဲသားများက ရာဇဝတ်မှုများကို မည်သို့နှိမ်နင်းကာကွယ်ခဲ့ရသည့် အကြောင်းများကို ရှင်းလင်းပြောပြလျှင် ကလေးသူငယ်တို့၏ စိတ်တွင် ပိုမိုစွဲလန်းပေမည်။ ထိုကဲ့သို့ ကိုယ်တွေ့ လေ့လာစေခြင်းအားဖြင့် ငြိမ်ဝပ်ပိပြားရေး ကိစ္စများတွင် ပိုမိုဂရုပြုလာမည့်အပြင် ရဲသားများ၏ လုပ်ငန်းကိုလည်း ပိုမိုနားလည်လာမည်ဖြစ်၏။

ရံဖန်ရံခါ ကျောင်းသူကျောင်းသားများသည် မိမိတို့ ရပ်ရွာမှ ထွက်ခွာ၍ ရာဇဝင်နှင့် ပတ်သက်သော အဆောက်အဦများ သစ်တောလုပ်ငန်း၊ လယ်ယာလုပ်ငန်း၊ သတ္တုတွင်းလုပ်ငန်း စသည်တို့ကို သွားရောက် ကြည့်ရှု လေ့လာသင့်သည်။ ရာဇဝင်နှင့် ပတ်သက်သော အဆောက်အဦများသည် နိုင်ငံသမိုင်းသင်ကြား ရာတွင် များစွာအထောက်အပံ့ ဖြစ်စေနိုင်သည့်အပြင် သစ်တောလုပ်ငန်း၊ လယ်ယာလုပ်ငန်း၊ သတ္တုတွင်း လုပ်ငန်း၊ စသည်တို့သည် တိုင်းပြည်၏ စီးပွားရေးပညာကို လေ့လာရာတွင် များစွာ အထောက်အပံ့ဖြစ်စေ၏။ မြန်မာနိုင်ငံ၏ သယံဇာတ ပစ္စည်းများ ကြွယ်ဝပုံကို စာအုပ်ဖြင့်သာ သင်ကြားခြင်းထက် ကိုယ်တွေ့ ပြသ သင်ကြားနိုင်လျှင် မျိုးချစ်စိတ် ပိုမိုထက်သန်မည်သာမက မမေ့ပျောက်နိုင်သော လက်တွေ့ဗဟုသုတများလည်း ရရှိနိုင်ပေမည်။

ကျောင်းသူကျောင်းသားများအား သတင်းစာ၊ဂျာနယ်၊မဂ္ဂဇင်းများ ဖတ်ရှုစေခြင်းသည်လည်း လောက ဇာတ်ခုံအကြောင်းကို သင်ကြားပြသခြင်းပေတည်း။ စာနယ်ဇင်းများကို လိမ်မာပါးနပ်စွာ ဖတ်ရှုနိုင်အောင် လမ်းပြပေးနိုင်လျှင် မိမိတို့၏ တိုင်းပြည်ရေးရာများသာမက ကမ္ဘာ့ ရေးရာများတွင်လည်း ပိုမို စိတ်ဝင်စားကြမည် ဖြစ်၏။ ကမ္ဘာပေါ်ရှိ နိုင်ငံအသီးသီးတွင် မည်ကဲ့သို့ ဖြစ်ပျက်လျက်ရှိသည်။ မည်ကဲ့သို့ တိုးတက်လျက် ရှိသည် ဟု ဗဟုသုတအမျိုးမျိုးရရှိကြမည် ဖြစ်သဖြင့် အထက်တန်းကျောင်းသား များသည် စာနယ်ဇင်းများကို ဖတ်လိုသော အကျင့် ဖြစ်ပေါ်အောင် ဖန်တီးပေးသင့်သည်။ 

အချုပ်အားဖြင့်ဆိုရသော် ကျောင်းတွင်းလောကသည် ပြင်ပလောကနှင် နီးစပ်နိုင်သမျှ နီးစပ်စေရမည်။ ကျောင်းတွင်းလောကသည် ပြင်ပလောက ဇာတ်ခုံ၏ တစိတ်တဒေသဖြစ်စေရမည်။ ကျောင်းလောကသည် ပြင်ပလောကနှင့် အဆက်ပြတ်၍ ထည်းထည်း တည်ရှိနိုင်သော လောကမဟုတ်ပေ။ ပြင်ပလောကဆိုသည် မှာလည်း မိမိတို့၏ နိုင်ငံတစ်ခုတည်းကိုသာ ကွက်၍ မြင်ရသော ကျဉ်းမြောင်းသည့်လောကမျိုး မဖြစ်စေသင့်ပေ။ ကမ္ဘာလောကတစ်ခုလုံးကြိုခုံ၍ မြင်နိုင်သော ကျယ်ဝန်းသည့်လောကမျိုးသာ ဖြစ်သင့်၏။ ကမ္ဘာပေါ်ရှိ နိုင်ငံအသီးသီးသည် တနေ့ထက်တနေ့ ပိုမိုရင်းနှီးစွာ ဆက်ဆံလာကြရသည် ဖြစ်ရကား တိုင်းစိတ် ပြည်စိတ် မွေးမြူရုံမျှမက ကမ္ဘာစိတ်ကိုလည်း မွေးမြူနိုင်ကြရန် ရှေ့ဆောင်သင်ကြားမှုသည် ပညာရေး ရှေ့ဆောင် လမ်းပြတို့၏ အရေးကြီးသော တာဝန်တရပ်ဖြစ်ပေသည်။
ကျောင်းတွင်း ဒီမိုကရေစီ အခန်း (၆)

Posted in: Articles, Literature, Politics