ကျောင်းတွင်း ဒီမိုကရေစီ အခန်း (၆)

ရေးသားသူ ✒️✒️✒️ ကုလသမဂ္ဂ အတွင်းရေးမှူးချုပ်ဟောင်း ဦးသန့်

ဒီမိုကရေစီကျောင်းထွက်သည် ဝါဒဖြန့်ခြင်းကို မျက်စိမှိတ်ပြီး ယုံကြည်မည့်သူ မဟုတ်ပေ။ ဆန်ခါတွင်တင်၍ အပြန်ပြန်အလှန်လှန် ဆင်ခြင်သုံးသပ်ပြီးမှသာလျှင် လက်ခံမည့် လူစားမျိုးဖြစ်သည်။ ကိုယ်ပိုင်ဉာဏ်ကို အများဆုံး အသုံးပြုရသော လူစားမျိုး ဖြစ်ပေသည်။ (ငါမသိပါဘူး ကွာ) ဟု ညည်းညူသော လူပျင်းတို့၏ လက်သုံးစကားကိုလည်း လက်ကိုင်ပြုခြင်းမရှိပေ။ မသိလျှင် သိအောင် လုပ်လိုစိတ်များကို မွေးမြူသူလည်း ဖြစ်၏။ ဒီမိုကရေစီကျောင်းထွက်တစ်ဦးသည် ပညာရှာရာတွင် အတောမသတ်သော ဆန္ဒရှိ၏။ 

အခန်း (၆)

လူတော်လူကောင်းများပေါ်ထွက်ရေး

ကျောင်းတွင်း ဒီမိုကရေစီနှင့် ပတ်သက်၍ အရေးကြီးသော အချက်အလက်များကို ကျွန်ုပ်တို့ ရေးသား ဆွေးနွေးပြီးခဲ့လေပြီ။ ထိုကဲ့သို့ ဒီမိုကရေစီ စံနစ်ကို ဂရုပြု၍ လိုက်နာဆောင်ရွက်သော စာသင်ကျောင်းများမှ မည်သို့သော ကျောင်းသူ ကျောင်းသားများ ပေါ်ထွက်လာပါမည်နည်းဟု မေးစရာရှိလေသည်။ အဖြေမှာ လွယ်ကူလှပေသည်။ ဒီမိုကရေစီဖြန့်ဖြူးသော ကျောင်းများမှ ဒီမိုကရေစီ ဝါဒကို သက်ဝင်ယုံကြည်လာသူများ ထွက်ပေါ်လာမည်ဖြစ်၏။ ထိုကျောင်းထွက်များသည် စာပေပါရဂူကြီးများ၊ သက်မွေးဝမ်းကျောင်း ပညာရပ်များတွင် နားလည်ကျွမ်းကျင်သူများသာမက ထို့ထက်ပိုမိုတန်ဘိုးရှိသော လူတော်လူကောင်းများ ထွက်ပေါ်လာမည်မှာ သေချာပေသည်။ စာပေတွင် ထိပ်ဆုံးတန်းမှ အောင်မြင်သူများ၊ အတွက်အချက်တွင် အံ့သြဘွယ် ထူးချွန်သူများ၊ နိုင်ငံသမိုင်းကို ကရားရေလွှတ်သလို တတွတ်တွတ်ပြောနိုင်သူများ၊ လောက ဓာတ်ပညာတွင် အရွယ်နှင့် မလိုက်အောင်တော်သူများ ထွက်ပေါ်ရေးသည် မည်သည့်စံနစ်နှင့်သင်သော ကျောင်းမျိုးပင် ဖြစ်စေကာမူ ဂုဏ်ယူနိုင်ပေသည်။ ဒီမိုကရေစီစနစ်နှင့် သင်သော ကျောင်းမျိုးသာမက သြဇာအာဏာနှင့် ဖိ၍ သင်သော ကျောင်းမျိုးကလည်း အထက်ပါလူစားမျိုးကို မွေးထုတ်နိုင်ပေသည်။ သို့ရာတွင် ဒီမိုကရေစီ စနစ်နှင့်သင်သော ကျောင်းမျိုးမှာမူ အခြားစံနစ်နှင့်သင်သော ကျောင်းမျိုးထက်သာသောအချက်မှာ အခြားမဟုတ်၊ စိတ်ထားမြင့်မြတ်၍ သတ္တိရှိသော သူများကိုမွေးထုတ်နိုင်ပေသည်။ ထိုကျောင်းထွက်များသည် သဘောထားကြီးခြင်း ကိုယ်ကျိုးထက် အများအကျိုးကို ကြည့်ခြင်း၊ ရပ်ရွာနယ်ပါယ် တိုင်းပြည် ကောင်းစားရေး အတွက် စေတနာရှိခြင်း၊ ရဲရင့်ခြင်းစသော ဂုဏ်ထူးဝိသေသများနှင့် ပြည့်စုံပေသည်။

ဒီမိုကရေစီစံနစ်အတိုင်း ဆောင်ရွက်စီမံသော ကျောင်းများမှ ထွက်လာသူများသည် အခြားစနစ်ဖြင့် သင်ကြားပို့ချသော ကျောင်းများမှ ထွက်လာသူများထက် မည်သည့် အရည်အချင်းများ ပိုမိုလာသည်ကို ရှင်းလင်းအောင်ဖော်ပြ၍ မဖြစ်နိုင်ပေ။ သို့ရာတွင် အကျဉ်းချုံး၍ ဖော်ပြရသော် ရကောင်း၏။

ဒီမိုကရေစီ အလေ့အကျင့်ရသော ကျောင်းသူကျောင်းသားတစ်ဦးသည် မိမိ၏ အစွမ်းကို မိမိကောင်းစွာ ယုံကြည်၏။ မိမိနှင့် သက်ဆိုင်သော ကိစ္စတစ်ရပ်ကို ဆောင်ရွက်ရလျှင် အောင်မြင်မည်ဟု စိတ်ချသူဖြစ်၏။ ရှေးကကြောက်ဆုတ်ဆုတ်လုပ်နေသောသူ ဖြစ်စေကာမူ ပိုမို၍ ရဲတင်းလာ၏။ မိမိ၏ သဘောဆန္ဒကို ထုတ်ဖော် ပြောဆိုရန် နောက်တွန့်ခြင်းမရှိပေ။ မိမိသည်စာတွင် ညံ့ဖျင်းစေကာမူ၊ မိမိတော်သောဘက်တွင် မိမိဂုဏ်ယူ၏။ ဥပမာစကားပြောကောင်းခြင်း သို့မဟုတ် ကစားခုန်စားဘက်တွင် ထူးချွန်ခြင်း၊ သို့မဟုတ် ရပ်ရွာအကျိုးကို အပင်ပန်းခံ၍ ဆောင်ရွက်လိုခြင်း စသောအရည်အချင်းများကို ကောင်းစွာ သဘော ပေါက်၍ အကျိုးရှိစွာ အသုံးချလိုစိတ်ရှိပေသည်။

ဒီမိုကရေစီ ကျောင်းထွက် တစ်ဦးသည် ပြဿနာတစ်ရပ်ရပ်ကို ကြည့်လျှင် ဟိုဘက်ဒီဘက် ခြုံ၍ ကြည့်၏။ အဆိုးနှင့် အကောင်း ကိုနိုင်းချိန်၏။ စဉ်းစားဝေဖန်၏။ ၎င်းနောက်မှ ဆုံးဖြတ်ချက် ချမှတ်၏။ အများ မိုးခါးရေ သောက်၍ လိုက်ပြီး သောက်လိုသော သူမဟုတ်ပေ။ ပင်ကိုယ်ဉာဏ်ကို တကယ်အသုံးပြု၏။ မိမိ၏ စွမ်းရည်ကို မိမိကောင်းစွာ ယုံကြည်ပေသည်။ လောကဇာတ်ခုံတွင် မိမိသည် အရှုံးကို တွေ့ရငြားလည်း အောင်မြင်မှုကို တွေ့ရဦးမည်ဟု အားတင်းနိုင်သောသူ ဖြစ်ပေသည်။ ဒီမိုကရေစီ ကျောင်းထွက်သည် အနိုင်မခံ အရှုံးမပေးသော သတ္တိခဲသာလျှင် ဖြစ်ဘိ၏။

ဒီမိုကရေစီ ကျောင်းထွက်သည် ကျရောက်သော တာဝန်ကို ကောင်းစွာ ထမ်းဆောင်လိုစိတ်ရှိပေသည်။ ကျောင်းတွင် တာဝန်အမျိုးမျိုးကို မိမိစွမ်းဆောင်သည့်ဘက်က ထမ်းဆောင်ခဲ့ရရာ ထို အလေ့အကျင့်သည် ကြီးပြင်းသည်တိုင်အောင် စွဲ၍ ပါလာတတ်၏။ သို့ရာတွင် ထိုကဲ့သို့ တာဝန်သိတတ်သော စိတ် မွေးမြူနိုင်ရန် တစ်နှစ် နှစ်နှစ်စသည်ဖြင့် သင်ကြား၍ မရနိုင်ပေ။ ကျောင်းတွင် နှစ်ပေါင်းအတော်ကြာအောင် လက်တွေ့ လိုက်နာဆောင်ရွက်မှသာလျှင် မွေးမြူနိုင်ပေမည်။ ဒီမိုကရေစီကျောင်းများတွင် ကျောင်းသူကျောင်းသား များသည် (ဒါတို့ကျောင်း) ဟူသော စိတ်ထားကို မွေးမြူရုံသာမက (ဒါတို့မြှင့်မှ မြင့်မည့်ကျောင်း) ဟူသော တာဝန်ခံစိတ်ထားကိုလည်း မွေးမြူကြရပေသည်။

တာဝန်သိတတ်သည်နှင့်အမျှ စုပေါင်းဆောင်ရွက်လိုစိတ် ထွင်၍ လုပ်လိုစိတ်များလည်း ရှိတတ်ပေသည်။ ကျောင်းသား ကျောင်းသူများသည် မိမိတို့ သန်ရာသန်ရာကိစ္စများတွင် ကိုယ်ထိလက်ရောက် ပါဝင်လုပ်ကိုင်ကြရသဖြင့် အများနှင့်ဆက်ဆံရသော လုပ်ငန်းများတွင် ကျင့်သားရသားပြီး ဖြစ်လေသည်။ အထက်မှ ချုပ်ချယ်မှုများ ကင်းလွတ်သဖြင့်လည်း ထွင်၍လုပ်လိုသော ဗီဇကလေး ပါလာတတ်၏။ ထိုဗီဇသည်ပင်လျှင် တိုးတက်မှု၏ အရင်းခံဖြစ်လေသည်။ ဥပမာကျောင်း မဂ္ဂဇင်းတွင် ပါဝင်ကူညီခဲ့ရသော ကျောင်းသူ ကျောင်းသား တစ်ဦးသည် ထိုးထွင်း၍ စိတ်ကူးခြင်း ထိုးထွင်း၍ ရေးသားခြင်း ဗီဇပါလာတတ်၏။ ထိုဗီဇ သည်ပင်လျှင် ဒီမိုကရေစီ စံနစ်၏ ကျေးဇူးတစ်ခု ဖြစ်ပေသည်။ 

ဒီမိုကရေစီကျောင်းထွက်သည် ဝါဒဖြန့်ခြင်းကို မျက်စိမှိတ်ပြီး ယုံကြည်မည့်သူ မဟုတ်ပေ။ ဆန်ခါတွင် တင်၍ အပြန်ပြန်အလှန်လှန် ဆင်ခြင်သုံးသပ်ပြီးမှသာလျှင် လက်ခံမည့်လူစားမျိုးဖြစ်သည်။ ကိုယ်ပိုင်ဉာဏ်ကို အများဆုံး အသုံးပြုရသော လူစားမျိုး ဖြစ်ပေသည်။ (ငါမသိပါဘူး ကွာ) ဟု ညည်းညူသော လူပျင်းတို့၏ လက်သုံးစကားကိုလည်း လက်ကိုင်ပြုခြင်းမရှိပေ။ မသိလျှင် သိအောင် လုပ်လိုစိတ်များကို မွေးမြူသူလည်း ဖြစ်၏။ ဒီမိုကရေစီကျောင်းထွက်တစ်ဦးသည် ပညာရှာရာတွင် အတောမသတ်သော ဆန္ဒရှိ၏။ 

ဒီမိုကရေစီကျောင်းထွက်သည် အပြောအဆို အမူအရာ အစခပ်သိမ်းတွင် ယဉ်ကျေးသိမ်မွေ့၏။ မောက်မာခြင်းမရှိ။ ဝင့်ကြွားခြင်းကင်း၏။ ဤအရည်အချင်းတို့သည် ကျောင်းမှပါလာသော အလေ့အကျင့်များသာ ဖြစ်ပေသည်။ ဆရာနှင့် တပည့် ဆက်ဆံရာတွင် ဆရာသည် တပည့်ကို မောက်မာခြင်းမရှိ၊ ဝင့်ကြွားခြင်း ကင်းခဲ့၏။ ဤနမူနာသည် ကျောင်းသားသူငယ်တို့၏ စိတ်တွင် အမြဲထာဝရ ကိမ်းအောင်းပေတော့မည်။ ၎င်းတို့သည် အများနှင့် ဆက်ဆံရာတွင် ပြေပြစ် ပျူငှာသည်သာတည်း။ 

ဒီမိုကရေစီ အလေ့အကျင့်သည် ရာဇဝတ်မှုများကိုပင် သိသိသာသာ လျော့နည်းစေလိမ့်မည်။ ဖျက်ဆီးလိုစိတ်၊ သူများမျက်ရည်ကျမှ ဝမ်းသာလိုစိတ်၊ ရိုင်းစိုင်းသော စိတ်ထားများသည် ဒီမိုကရေစီ၏ စံနစ်တွင် ပျောက်ကွယ်ရမည်သာတည်း။

ဒီမိုကရေစီကျောင်းထွက်တစ်ဦးသည် ဒီမိုကရေစီစနစ်၏ နည်းနာနိသျများကိုလည်း နားလည်ပြီး ဖြစ်ပေသည်။ အစည်းအဝေးကို မည်ကဲ့သို့ ကျင်းပရသည်။ သဘာပတိကို မည်ကဲ့သို့ ရွေးချယ်ရသည်။ အဆိုကို မည်ကဲ့သို့ တင်သွင်းရသည်။ ထိုအဆိုကို မည်ကဲ့သို့ မဲခွဲရသည်ဟူသော အချက်များတွင် ကျင့်သားရပြီးဖြစ်ပေသည်။ ကျောင်းအပြင်ရှိလောကဇာတ်ခုံတွင် ထိုနည်းနာနိသျများကို အကျိုးရှိစွာ အသုံးချနိုင်ပေတော့မည်။ ဤကား ဒီမိုကရေစီစံနစ်ဖြင့် တိတိကျကျသင်ကြားပို့ချသော ကျောင်းများမှ ထွက်ပေါ်နိုင်ပါမည် နည်းဟူသော မေးခွန်းကို အကျဉ်းချုံး၍ ဖြေရသော် လူတော်လူကောင်းများ ပေါ်ထွက်လာမည်ဟု ဖြေဆိုနိုင်သည်။
ကျောင်းတွင်း ဒီမိုကရေစီ အခန်း (၇)နိဂုံး

Posted in: Articles, Literature, Politics