ရေးသားသူ ✒️✒️✒️ ကုလသမဂ္ဂ အတွင်းရေးမှူးချုပ်ဟောင်း ဦးသန့်
စာသင်ကျောင်းများ၏ အဓိကရည်ရွယ်ချက်မှာ ကျောင်းသူကျောင်းသားများ စာမေးပွဲ အောင်မြင်ရန် မဟုတ်၊ အလုပ်ရရန်မဟုတ်၊ အသက်မွေးဝမ်းကျောင်း ပညာတစ်ခုခုကို တတ်ကျွမ်းရန်လည်းမဟုတ်၊ ကျောင်းသူ ကျောင်းသားများသည် သိနားလည်သော တိုင်းသူပြည်သားကျောင်းများ ဖြစ်လာကြစေရန် ရည်ရွယ်ချက် ထားရှိရပေမည်။ ထိုသို့သော တိုင်းသူပြည်သားကောင်း ဆိုသည်မှာလည်း ဒီမိုကရေစီသဘောတရားများကို ကောင်းစွာ သဘောပေါက်နားလည်၍ ကောင်းစွာ လက်တွေ့ကျင့်သုံးနိုင်သူများ ဖြစ်စေရမည်။ ဤကား စာသင်ကျောင်းတိုင်း၏ အဓိကရည်ရွယ်ချက် ဖြစ်ရစေမည်။
အခန်း (၇)
ထောက်ခံအကြံပေးချက်များ
အထက်တွင် ဖော်ပြပါရှိသော အကြံပေးချက်များကို အကျဉ်းချုံး၍ ပြန်လည်ဖော်ပြရန် လိုအပ်ပေသည်။ ထို့ကြောင့် ဤအခန်းတွင် အရေးကြီးသော အချက်အလက်များကို အကျဉ်းချုံး၍ ပြန်လည်ဖော်ပြပေအံ့။
စာသင်ကျောင်းများ၏ အဓိကရည်ရွယ်ချက်မှာ ကျောင်းသူကျောင်းသားများ စာမေးပွဲအောင်မြင်ရန် မဟုတ်၊ အလုပ်ရရန်မဟုတ်၊ အသက်မွေးဝမ်းကျောင်း ပညာတစ်ခုခုကို တတ်ကျွမ်းရန်လည်းမဟုတ်၊ ကျောင်းသူ ကျောင်းသားများသည် သိနားလည်သော တိုင်းသူပြည်သားကျောင်းများ ဖြစ်လာကြစေရန် ရည်ရွယ်ချက် ထားရှိရပေမည်။ ထိုသို့သော တိုင်းသူပြည်သားကောင်း ဆိုသည်မှာလည်း ဒီမိုကရေစီသဘောတရားများကို ကောင်းစွာ သဘောပေါက်နားလည်၍ ကောင်းစွာ လက်တွေ့ကျင့်သုံးနိုင်သူများ ဖြစ်စေရမည်။ ဤကား စာသင်ကျောင်းတိုင်း၏ အဓိကရည်ရွယ်ချက် ဖြစ်ရေမည်။
တိုင်းသူပြည်သားကျောင်းဆိုသည်မှာ လူတော်လူကောင်းဖြစ်ရန် အရေးကြီးပေသည်။ ပညာတရပ်ရပ် တွင် မည်မျှပင် ထူးချွန်စေကာမူ စာရိတ္တ ချွတ်ယွင်းလျှင် ထိုသူသည် လူတော်လူကောင်း မဟုတ်နိုင်တော့ပေ။
ထို့ကြောင့် ပညာသင်ကြားရာ၌ ဘာသာရပ်များကို ကောင်းစွာ နားလည်သင့်သကဲ့သို့ လူတော်လူကောင်း ဖြစ်လာရေးကိုလည်း ကောင်းစွာ နားလည်သင့်ပေသည်။ ကျောင်းသူကျောင်းသားများ အား အောက်ပါ ရည်ရွယ်ချက်များဖြင့် ဖန်တီးပေးရန်လည်း အရေးကြီးပေသည်။
(က) မိမိ၏ ကိန်းအောင်းနေသော ဉာဏ်၊ အစွမ်းသတ္တိ၊ လုပ်ရည်ကိုင်ရည်တို့ကို အစွမ်းကုန် အသုံးပြု နိုင်ရန် လမ်းဖွင့်ပေးရမည်။ သို့မှသာလျှင် ၎င်းသည် အသုံးဝင်သော တိုင်းသူပြည်သားကောင်း တစ်ယောက် ဖြစ်လာနိုင်ပေမည်။
(ခ) မိမိ၏ ပတ်ဝန်းကျင်ရှိ လူ့လောက အတွင်း၌ မည်ကဲ့သို့ နေထိုင် ကျင့်သုံးရမည် ဟူသော လက်တွေ့ဗဟုသုတကိုလည်း ပေးရမည်။
(ဂ) မိမိ၏ ဝါသနာပါသော လုပ်ငန်းတစ်ခုခုဖြင့် ပြင်ပလောက၏ ကောင်းကျိုးအတွက် ဆောင်ရွက် နိုင်စေရမည်။
(ဃ) လူအချင်းချင်း ဆက်ဆံမှုတွင်လည်း ယဉ်ကျေးသိမ်မွေ့၍ ကူညီရိုင်းပင်းလိုသော စိတ်များ ပေါ်ပေါက်လာအောင် လက်တွေ့ နည်းများဖြင့် သင်ကြား ပို့ချပေးရမည်။
ကျောင်းတွင်း ဒီမိုကရေစီအောင်မြင်ရန် အတွက် ကျောင်းသူကျောင်းသားများသည် လွတ်လွတ် လပ်လပ် မိမိတို့၏ စိတ်ဆန္ဒကို ပြသနိုင်ခွင့် ရှိစေရမည်။ သို့ရာတွင် ဆရာကြီးနှင့် ဆရာ ဆရာမများ၏ ရှိပြီး ဖြစ်သော ထူးခြားသည့် အခွင့်အရေးများကို ထိခိုက်စေခြင်း မရှိစေရ၊ ထိုအချက်ကို ဆရာနှင့် တပည့်ကောင်းစွာ သဘောပေါက်လျှင် ကျောင်းတွင်းလောကသည် အလွန်အဆင်ပြေသော လောက ဖြစ်ပေလိမ့်မည်။
ကျောင်းသူကျောင်းသားများ ကြီးပြင်းလာသောအခါ ဒီမိုကရေစီဝါဒကို ကောင်းစွာကျင့်သုံးနိုင်ရန် အတွက် ကျောင်းနေစဉ်ကာလ၌ ဒီမိုကရေစီ နည်းနာနိသျများကို တတ်နိုင်သလောက် လိုက်နာ ကျင့်သုံးရမည်။ ထိုသို့ကျင့်သုံးနိုင်ရန်အတွက် အောက်ပါအချက်များသည် အရေးကြီးပေသည်။
(က) ကျောင်းသူ ကျောင်းသား တိုင်းသည် ကျောင်းတွင်းကိစ္စများကို စီမံရာ၌ တတ်နိုင်သလောက် ကိုယ်ထိ လက်ရောက် ပါဝင်သင့်သည်။
(ခ) ကျောင်းတွင်းကိစ္စများနှင့် ပတ်သက်၍ ကျောင်းသူကျောင်းသားများသည် ရံဖန်ရံခါ လွတ်လွတ် လပ်လပ် ဆွေးနွေးစေရမည်။
(ဂ) ဆရာ ဆရာများ၏ ထူးခြားသော အခြေအနေနှင့် အခွင့်အရေးကို ကျောင်းသူ ကျောင်းသားများက အသိအမှတ်ပြုရသည့်နည်းတူ ကျောင်းသူကျောင်းသားများ၏ အခွင့်အရေးများကိုလည်း ဆရာ ဆရာမများက အသိအမှတ်ပြုသင့်ပေသည်။
(ဃ) ကျောင်းသားများအား ရံဖန် ရံခါ တာဝန်ယူရသော အလုပ်ဝတ္တရားများကို လွှဲအပ်ပေးသင့် ပေသည်။ သို့မှသာလျှင် ကျောင်းသူ ကျောင်းသားများသည် ကျရောက်သော တာဝန်ကို ထမ်းဆောင် နိုင်ပေလိမ့်မည်။
(င) အတန်းအုပ်များ ရွေးချယ်ရာ၌ သော်လည်းကောင်း၊ အခြားတာဝန်ရှိသော နေရာများသို့ ကျောင်းသူကျောင်းသားများအား ရွေးချယ်ရန်ရှိလျှင် မဲဆန္ဒဖြင့် ရွေးချယ်ခြင်းသည်သာလျှင် အကောင်းဆုံး နည်းလမ်းဖြစ်ပေသည်။ ဆရာကြီးကသော်လည်းကောင်း၊ ဆရာ ဆရာမများကသော်လည်းကောင်း သဘော အတိုင်းရွေးချယ်ခြင်းသည် ဒီမိုကရေစီ အလေ့အထသင်ကြားမှုနှင့် ဆန့်ကျင်၏။
(စ) ဆရာနှင့် တပည့်စုပေါင်း၍ အတူတကွ ဆောင်ရွက်လုပ်ကိုင်ရသော ကိစ္စမျိုးကို မကြာခဏ ပြုလုပ် ဖန်တီးပေးရမည်။ ဆရာသည် တပည့်များအား သြဇာပေးသူမဟုတ်ဘဲ ရှေ့ဆောင်လမ်းပြ ကောင်းကျိုး လိုလားသူ မိတ်ဆွေကြီးဖြစ်သည်ဟု တပည့်များ၏ စိတ်တွင် ဖြစ်စေရမည်။
(ဆ) ကျောင်းစည်းကမ်းများ ရေးဆွဲရာတွင် လိုသည်ထက်ပို၍ မရေးဆွဲသင်ပေ။ အထက်တန်း ကျောင်းများတွင် ကျောင်းစည်းကမ်းများကို တတ်နိုင်သရွေ့ ကျောင်းကောင်စီများ၏ သဘောတူညီချက် ဖြင့်သာ လျှင် ရေးဆွဲသင့်ပေသည်။
(ဇ) ဆရာနှင့် တပည့်များသည် ရံဖန်ရံခါ စုပေါင်း၍ ကစားခြင်း၊ အပြင်သို့ လှည့်လည်သွားရောက်ခြင်း နှီးနှောခြင်း စသည်တို့ကို ပြုလုပ်သင့်ပေသည်။ ကျောင်းသားမိဘများသည် ကျောင်းနှင့် နီးကပ်နိုင်သမျှ နီးကပ်အောင် ဆက်သွယ်ထားသင့်ပေသည်။ ကျောင်း၏အရေးသည် ဆရာနှင့် ကျောင်းသားများ၏ အရေး သာမက မိဘများ၏ အရေးလည်း ဖြစ်သည်ဟု သဘောပေါက်စေသင့်၏။ ထို့ကြောင့် ဆရာများနှင့် မိဘများ ပူးပေါင်း၍ အသင်းဖွဲ့စည်းခြင်းသည် အလွန်အကျိုးရှိစေနိုင်၏။ ထိုအသင်းများ၏ လုပ်ငန်းအရပ်ရပ်ကို ကာလ ဒေသလိုက်၍ သတ်မှတ်ထားရှိသင့်ပေသည်။ ကျောင်းသားဟောင်းများသည်လည်း အသင်းအပင်းဖွဲ့စည်း၍ မိမိတို့၏ ကျောင်းဟောင်းနှင့် နီးကပ်စွာဆက်သွယ်နိုင်လျှင် ကျောင်းအတွက် များစွာ အကျိုးများနိုင်ပေသည်။
ကျောင်းသူကျောင်းသားများသည် လောကဇာတ်ခုံကြီး၏ အကြောင်းအရာများကို သိရှိ နားလည် ကြစေရန်အတွက် မကြာခဏဆေးရုံများ စာတိုက်များ ရဲဌာနများ လယ်ယာများ အလုပ်ရုံများ စသည်တို့ကို လည်ပတ်ကြည့်ရှု သင့်ကြသည်။ ထိုမျှသာမဏ မျိုးချစ်စိတ်ထက်သန်စေရန်အတွက် ရာဇဝင်နှင့်ဆိုင်သော အဆောက်အဦးများကိုလည်း ကြည့်ရှုလေ့လာသင့်ပေသည်။
ကျောင်းသူကျောင်းသားများသည် ကျောင်းထွက်သည်နှင့်တပြိုင်နက် ဒီမိုကရေစီအလေ့အထများတွင် ကျင့်သားရပြီး ဖြစ်စေသင့်သည်။ ဥပမာ အစည်းအဝေးကျင်းပခြင်း၊ သဘာပတိရွေးကောက်ခြင်း၊ အဆိုတင် သွင်းခြင်း၊ ထောက်ခံခြင်း၊ ကန့်ကွက်ခြင်း စသည့် အချက်တို့ကို ကောင်းစွာ နားလည်ကျွမ်းကျင်ပြီး ဖြစ်စေရမည်။ ကျောင်းသားကြီးများသည် မြူနီစပါယ် အစည်းအဝေးများ၊ တရားရုံးများ စသည်တို့ကို သွားရောက် ကြည့်ရှုခြင်းသည် များစွာ အကျိုးများနိုင်သည်။
ကျောင်းတွင် စည်းကမ်းသတ်မှတ်ရာ၌ ဆရာကြီးနှင့် ဆရာများက ၎င်းတို့၏ သဘောအတိုင်း သတ်မှတ်ခြင်းထက် ကျောင်းကောင်စီများတွင် တင်ပြပြီးနောက် ဆွေးနွေးအတည်ပြုပြီးမှသာလျှင် ပြဌာန်းသင့် ပေသည်။ သို့မှသာလျှင် စည်းကမ်း ဥပဒေများသည် လိုက်နာရမည့်သူများကိုယ်တိုင် သဘောတူလက်ခံပြီး သော စည်းကမ်းများဖြစ်သဖြင့် ဒီမိုကရေစီ စံနစ်နှင့် ကိုက်ညီပေသည်။
ကျောင်းတွင်းဒီမိုကရေစီအောင်မြင်စေရန်အတွက် ဆရာရော တပည့်ပါ ယုံယုံကြည့်ကြည်လိုက်နာကျင့် သုံးသင့်ပေသည်။ လူကြားကောင်းရုံ ဒီမိုကရေစီလုပ်တမ်းကစားခြင်းသည် အလွန်အကျိုးယုတ်နိုင်ပေသည်။ ထိုကဲ့သို့ ပေါ့ပျက်ပျက် ဖြစ်ကတတ်ဆန်းပြုလုပ်ပါက ကျောင်းသားကျောင်းသားများသည် တသက်ပတ်လုံး ဒီမိုကရေစီသဘောတရားများကို ပေါ့ပျက်ပျက်ပင် မှတ်ထင်ယုံကြည်ပေလိမ့်မည်။
ကျောင်းတွင်းဒီမိုကရေစီ အောင်မြင်သည် မအောင်မြင်သည်ဟူသော အချက်ကို အကဲခပ်ရန် မခဲယဉ်း လှသော ဒီမိုကရေစီ စနစ်ကို လိုက်နာသော ကျောင်းများတွင် ကျောင်းသူ ကျောင်းသားများသည် ရဲရင့်ခြင်း၊ ယဉ်ကျေးခြင်း၊ မိမိတို့ပြောလိုသော အချက်အလက်ကို မဆုတ်ပြောတတ်ခြင်း၊ အများအကျိုးအတွက် ဆောင်ရွက်လိုခြင်း၊ ပြည်သူ့တာဝန် ဝတ္တရားများနှင့် အခွင့်အရေးများကို ကောင်းစွာသိခြင်း စသည့် အရည်အချင်းများကို တွေ့နိုင်ပေသည်။ ဒီမိုကရေစီစံနစ်ကို မလိုက်နာသော ကျောင်းများတွင်မူကား ကျောင်းသူ ကျောင်းသားများသည် အထက်ပါအရည်အချင်းများ မရှိဘဲ ကြောက်ရွံခြင်း၊ အထက်မှ ခိုင်းသည်ကို သာ လုပ်တတ်ခြင်း၊ မိမိတို့၏ ပင်ကိုယ်ဉာဏ်ကို အသုံးမပြုတတ်ခြင်း စသည်တို့ကို တွေ့နိုင်ပေသည်။
ပြည်ထောင်စုမြန်မာနိုင်ငံတော်အတွင်းရှိ စာသင်ကျောင်းများတွင် ဒီမိုကရေစီစံနစ်ကို လိုက်နာကျင့်သုံး ကြမည်လော။ သို့တည်းမဟုတ် ဒီမိုကရေစီ စနစ်ကိုပယ်၍ သြဇာအာဏာနှင့် အုပ်ချုပ်ကြမည်လော။ အဖြေနှင့် ပတ်သက်၍ ဝိဝါဒ ကွဲပြားရန်မလိုဟု ကျွန်ုပ်တို့ ယုံကြည်၏။ ကျွန်ုပ်တို့၏ ကျောင်းတိုင်းသည် ဒီမိုကရေစီ ဝါဒကို လက်တွေ့ကျင့်သုံးသော ကျောင်းများသာ ဖြစ်ရန် အကျွန်ုပ်တို့လိုလားပေသည်။ သို့မှသာလျှင် ကျွန်ုပ်တို့၏ ကျောင်းသူ ကျောင်းသားများသည် ဒီမိုကရေစီနိုင်ငံတည်ဆောက်ရေးတွင် အကျိုးရှိစွာ ပါဝင်ဆောင်ရွက်နိုင်ကြ ရန် အခြေခံရှိပြီး ဖြစ်ကြပေလိမ့်မည်။ ကျောင်းတွင်းဒီမိုကရေစီသည် ဒီမိုကရေစီနိုင်ငံ၏ တောင့်တင်းခိုင်မာသော အခြေခံ အုတ်မြစ်ကြီးသာလျှင်ဖြစ်၏။
ဦးသန့်
